Chinese Rocket Debris, Inaasahang Mahulog Malapit sa Baybayin ng Palawan

Philippines Jef Maitem - : Dec 8, 2025 - : 9:21 am

Kinumpirma ng Philippine Space Agency o PhilSA nitong araw ng Sabado ang paglulunsad ng Long March 8A rocket mula China.

Ayon sa PhilSA, inaasahang babagsak ang debris mula sa rocket sa mga itinakdang drop zone — humigit-kumulang 120 nautical miles mula sa El Nido, Palawan; 140 NM mula sa Puerto Princesa; 48 NM mula sa Tubbataha Reefs Natural Park; 31 NM mula sa Hadji Muhtamad, Basilan; at 40 NM mula sa Pangutaran Island, Sulu.

Inilunsad ang Long March 8A mula sa Hainan International Commercial Launch Center sa Wenchang, Hainan, alas–3:52 ng hapon nitong Sabado.

Ayon sa PhilSA, nakapagbigay na sila ng pre-launch report sa mga kaukulang ahensya ng gobyerno. Paliwanag ng ahensya, ang mga hindi nasusunog na bahagi ng rocket—gaya ng booster at fairing—ay karaniwang inaalis habang umaakyat ang rocket sa kalawakan.

Bagama’t hindi inaasahang tatama ang debris sa mga pulo o tinitirhang lugar, maaari itong magdulot ng panganib sa mga barko, eroplano, fishing boats, at iba pang sasakyang-dagat na daraan sa drop zone.

May posibilidad din, ayon sa PhilSA, na lumutang ang debris at tangayin patungo sa mga baybayin sa paligid.

Hindi rin isinasantabi ang posibilidad ng uncontrolled re-entry ng upper stages ng rocket mula sa kalawakan.

Samantala, pinayuhan ng PhilSA ang publiko na agad ipaalam sa lokal na awtoridad kapag may nakitang pinaghihinalaang rocket debris. Huwag umano itong pulutin o lapitan dahil maaaring naglalaman ito ng toxic substances, kabilang ang natirang rocket fuel.