A view from inside the Philippine Navy's BRP Jose Rizal (FF150) shows the Royal Australian Navy's HMAS Brisbane (DDG41) during the 10th Multilateral Maritime Cooperative Activity (MMCA). (Photo by SSg Ambay PA / PAOAFP)

Pilipinas, Australia, Canada at U.S., Naglayag nang Magkasama sa Karagatan Malapit sa Scarborough Shoal

Philippines Jef Maitem - : Sep 5, 2025 - : 8:42 pm

Naglayag nang magkakasama ang Australia, Canada, Estados Unidos, at Pilipinas — malapit sa Scarborough Shoal sa West Philippine Sea, kung saan nananatiling matatag ang presensiya ng Tsina sa pinagtatalunang karagatan.

Ang dalawang araw na aktibidad ng mga magkaalyadong bansa ay isinagawa nitong Setyembre 2 at 3 sa karagatan mula Palauig hanggang San Antonio, Zambales.

Ito’y bahagi ng Ika-Sampung Multilateral Maritime Cooperative Activity, isang pinagsamang pagsasanay sa karagatan na layong palakasin ang rehiyonal na kooperasyon at panatilihin ang isang malaya at bukas na Indo-Pasipiko.

Lumahok dito ang HMAS Brisbane (DDG41) at P-8A Poseidon maritime patrol aircraft ng Australia; HMCS Ville de Québec (FFH332) at CH-148 Cyclone ng Canada; P-8A Poseidon ng Estados Unidos; at ang BRP Jose Rizal (FF150), AW159 helicopter, SAR Sokol aircraft, at isang C-208B surveillance platform ng Pilipinas.

Sa pagsasanay na ito nagsagawa ang mga mandaragat ng Vertical Replenishment upang subukan ang logistics at operasyon ng muling pagsuplay habang nasa dagat, gayundin ang isang Personnel Exchange sa pamamagitan ng RHIB na nagbigay-daan sa mga mandaragat.

Itinampok din sa ehersisyo ang isang Coordinated Anti-Submarine Warfare Exercise upang mapahusay ang kakayahan sa pagtuklas at pagsubaybay, at isang Passing Exercise, na nagpakita ng maayos na koordinasyon at interoperabilidad ng lahat ng kalahok na pwersa.

Binigyang-diin ni Heneral Romeo Brawner Jnr, hepe ng sandatahang lakas ng Pilipinas, ang kahalagahan ng patuloy na kooperasyon sa gitna ng mga kamakailang multilateral na inisyatiba.

“Pinagtitibay nito ang ating sama-samang paninindigan na protektahan ang ating karagatan at panatilihin ang kaayusang pandaigdig na nakabatay sa batas. Patuloy nating palalalimin ang pundasyon ng pagtitiwala, na nagpapatunay na tunay tayong mas malakas kapag nagkakaisa,” ani Brawner.

Ayon sa Hukbong Dagat ng Pilipinas, dalawang barkong pandigma ng Tsina — isang Luyang-class guided-missile destroyer at isang Jiangkai-class frigate — ang sumubaybay sa kanilang pinagsanib na pagsasanay ngunit hindi naman ito nakaapekto sa operasyon.

Sinabi ng militar ng Tsina na nagsagawa lamang sila ng mga “routine patrols” sa South China Sea, ngunit ayon kay Rear Adm. Roy Vincent Trinidad, tagapagsalita ng Hukbong Dagat para sa West Philippine Sea, ginagawa lamang nila ito upang “bigyang-katwiran ang kanilang ilegal na presensiya sa exclusive economic zone ng bansa.”

Ang Scarborough Shoal — na kilala sa Pilipinas bilang Panatag Shoal — ay isa sa ilang pinagtatalunan sa South China Sea.

Ito’y isang mahalagang daanang pandagat kung saan ang magkakapatong na pag-aangkin ng Tsina, Pilipinas, Vietnam, Malaysia, at iba pa ay nagpasiklab ng dekada-dekadang tensyon sa dagat.

MORE NEWS